Treff@mieser-kerwe.de


	Zum Treff

	Bundeskegelbahn

	Miesau, Mühlstr. 133a

Unser zwetter Kneipetescht hat am 04.04.2003 in de Kegelbahn “Zum Treff” stattgefunn. Dort hann mer nadeerlich nett nur was geß unn enner odder zwee getrunk, sondern - wie sich das gehert - ah gekegelt.

Hier die Bewertung des gelungenen Owends:




		“Treff ich was?”


	1. Essen:

Im Treff gebt’s gutbürgerlichi Küch. Unn da mer all gute Bürger sinn ;-) hatt’s uns ah alle gut geschmeckt. Die Salate war’n lecker. Die Schnitzel sinn werklich Hammer-Portione. Do werd jeder normale Mensch dicke satt devunn. Als enzischstes is e bische die klee Pizza vum Keeder aus de Reih’ gefall. Awwer der Kerl hätt jo ah was Gescheides esse kenne. Er war bestimmt nett satt wor... Insgesamt: 4 Sterne!


	2. Getränke:


	Es Cola-Weze hat 4 Sterne verdient unn die Schnäpscher (Ouzo met Kristalle owwedruff) uffgrund des Preis/Leistungs- Verhältnisses (EUR 1,30/Schnäpsche) sogar 5.


	3. Service:


	Es Ramona hat alleen bedient, war awwer immer uff Zack unn sehr freindlich. Ah wenn mer de Knack vermißt hann, kenne mer uns in keenschter Weise beschwere. Eigentlich wollt es Ramona “um 3 im Bett sinn”. Mer hann dann awwer doch noch bis dreiverdel 4 gehuckt. Sehr gut!


	4. Drumrum:



	Die Pokale sinn nett vunn uns!

Mer hann ganz links uff der Kegelbahn gespeelt. Da mer vorher gesa’t kriet hann, daß do hinnedran zum Sitze eigentlich nur Platz fer 12 Leit is, kenne mer ah nix degeje sa’n, daß es e bische kuschelig eng war (mer war nämlich deitlich meh als 12 Leit). Uff de Kegelbahne newedran hann äldere Semester die Kugel geschob (Zitat Kusseng: “Dicke Hitschehauser, die uff Tandems heemfahre”). Es war alles sauber unn hygenisch. 4 Sterne.


	5. Spiel & Spaß:


	Es gebt selbschtverständlich sehr gude Kegelbahne (7 EUR pro Stunn). Außerdem gebt’s noch e Billarddisch, uff dem man die kleenere Kugele metem Stecke dorum schieße kann.


	6. Specials:



		“Sport”kegeln


	Die Preise sinn bei de Vieltrinker no unne abgerundet wor unn - ich glab - fer es Billardspeele mußte mer nix bezahle. Außerdem war die freindlich Bedienung e Special. Awwer das hann mer schunn an annerer Stell met Punkte bewertet.


	Fazit unn Gesamt:


	Glatte 4 Punkte im Dorchschnitt. Es Treff is nett nur fer Kegler sondern ah fer Leit met viel Hunger unn fer solche, die enfach e gemietlicher Owend beim e Bierche unn em Schnäppsche in ner Kneip’ verbringe wolle zu empfehle.



			Jörg Rummler - Kegelgott!



		uff die Mieser-Kerwe-HP