Edi@Mieser-Kerwe.de

Edi’s Pizzaria

Bahnhofstr. 74, Buchholz

Bei unserm dritte Kneipetescht am 02.05.2003 war newer Esse unn Trinke ah widder sportliche Betätigung angesa’. Mer war’n in der alt ingesessen Kneip “Edi’s Pizzaria” in Buchholz. Unn die hat ganz hinne noch e guudi aldi Kegelbahn. Die äldere Semester wer’n sich erinnere ;-). Die Waldschänk läßt grüße!

Lange Rede, korzer Sinn
Das soll unser Bewertung fer de Edi sinn:

1. Essen:

Beim Edi gebt’s Pizza, Nudelgerichte, Salate unn ah so manches guudi Stick Flesch kommt uff de Deller. Ma hat eigentlich kee Grund sich zu beschwere, außer wenn mol die Zwiwwel uff ener Seit e bische wenig sinn...

Achtung: Die “Spaghetti Don Alfonso” sinn höllisch scharf!

2. Getränke:

Beim Edi gebt’s es billigschte Cola-Weeze (EUR 2,10) weit unn breit. Unn es is noch lecker dezu. Was soll mer do noch meh sa’n?

Wasser met Zitron war ah okay ;-)

3. Service:

außem Stiefel trinke macht Spaß!

Normalerweise heßt’s jo: Wenn die Katz außem Haus is, danze die Mäus uffem Disch. Beim Edi is das nett so. De Chef hat nett geschafft unn schunn hann die Angestellte die Kneip viel zu früh zu gemacht... Mer wurde schunn so geje 1:00 odder 1:30 rauskomplimentiert.
Was mer em Chef zu gute halle muß: Er war korz do unn hat uns e Steen ausgeb.
Unser Bedienung war nett so uff Zack unn war genervt, weil mer so oft uff die Klingel (s.u.) gedrickt hann... Mer hotte halt Dorscht!

4. Drumrum:

Mer hann hinne in dem Räumche met de Kegelbahn gehockt. Man beachte den Klingelkaschte newer de Deer fer die Bedienung zu rufe ;-). Leider geht die Gejesprechanlag nett. Ansonschte hann mer an der Kneip nix auszusetze. E sauwer ingerichtetes Lokal.

5. Spiel unn Spaß:

Es gebt die gut, alt Kegelbahn unn vorne soll ah noch e Dart sinn (hann mer nett ausprobiert). Es Kegele hat Spaß gemacht! Mer sinn jo kee Profis unn brauche nett es neiste Equipment.

6. Specials:

Die Benutzung der Kegelbahn war fer umme. Das is uns uff jede Fall 3,5 Sterncher wert. E Dankeschön an de Wert!

Fazit unn Gesamt:

Vor alle Dinge zum Cola-Weeze trinke unn um de Hunger zu stille, kenne mer de Edi nur empfehle.
Wenn es nächste mol länger uff is, werd die Bewertung ah noch besser...

Zwee, die sich lieb hann ;-)

Ener, der dumm guggt ;-)

uff die Mieser-Kerwe-HP